إمبارح إتكلمنا عن مقدمة عن السموم الأربعة.

النهاردة بقي إن شاء الله هنتكلم عن اول سم من سموم العلاقات، إللي هو:
1-اللوم CRITICISM.

وده يمكن إحنا بنمارسه كتير في علاقتنا وإحنا مش واخدين بالنا، بالذات في المشاكل والخناقات.

المشكلة في اللوم فين بقي؟؟

-مشكلة اللوم إن الطرف إللي بيلوم ده بيوصل رسالة للطرف التاني ان المشكلة فيك انت، مش في سلوكك ودي اللي بتعمل مشاكل كتير، وساعتها المشكلة اللي كانوا بيتناقشوا فيها مابتتحلش لأ بالعكس دي اتحولت لمشكلة اكبر.

خلينا ناخد مثال عشان الصورة توضح اكتر:

رامي وهالة كانوا قاعدين قاعدة صفا كده مع بعض في البلكونة والدنيا هادية وجميلة وبيشربوا الشاي مع بعض وقاعدين بسمعوا الست “أم كلثوم” وبيدندوا معاها ومنسجمين أخر إنسجام، ووسط الإنسجام الجميل ده، حصل الحوار ده:

رامي:هالة هو انتي غسلتيلي الطقم اللي هسافر بيه بليل؟.

هالة:لامغسلتهوش يا رامي البس اي طقم تاني.

رامي:هو انتي علطول كده مفيش حاجة اطلبها منك تعمليها، انا زهقت من قلة نظامك وقلة إهتمامك بيا.

شوفتوا الحوار اللي فوق ده، هو ده اللوم انك تحسس الشخص اللي قدامك ان هو المشكلة.

و طبعا اغلبنا عارفين نهاية الحوار دي إيه؟

طيب ايه الحل؟؟

الحل هو إستخدام ال”I STATEMENT” يعني ايه الكلام ده؟
يعني نستخدم جملة “أنا” و الإحساس بتاعك بطريقة إيجابية من غير لوم.

وعشان ده يحصل محتاجين نسأل نفسنا سؤالين؟

1-?What do i feel

يعني أنا حاسس أو أنا حاسة بأيه في الموقف ده، إيه إللي ضايقني؟إيه إللي مخليني زهقان أو زهقانة؟……الخ

2-?What do i need

يعني أنا محتاج أو محتاجة إيه من شريكي في الموقف ده ؟

لو هنقيس الكلام ده علي المثال بتاعنا وتخيلنا الحوار مشي بالطريقة إللي قولنا عليها هيمشي كده:

رامي:هالة هو انتي غسلتيلي الطقم اللي هسافر بيه بليل؟

هالة:لامغسلتهوش يا رامي البس اي طقم تاني.

رامي:تعرفي يا هالة إني بتضايق جدا لما أطلب منك حاجة ومتعمليهاش لما ده بيحصل بيحسسني بعدم اهتمام وده كمان بيضايقني، ممكن المرة الجاية تاخدي بالك من النقطة دي.

شوفتوا الفرق بين الإسلوب الأولاني والإسلوب التاني.

تخيلوا لو إبتدينا نطبق إسلوب الحوار ده في حياتنا عموما وعلاقتنا بشريك حياتنا خصوصا، الدنيا هتفرق أد إيه في علاقتنا بشريك حياتنا؟؟

وعشان تعرفوا أكتر عن السم الأول شوفوا اللينك في أول الكومنت.

أشوفكم البوست إللي جاي عن السم التاني.

وإستنونا عشان حوار هالة ورامي لسة مخلصش.

Coaching_With_Moaz

Leave a Reply

Your email address will not be published. Required fields are marked *