بصراحة الاخت شيرين أثارت السؤال ده وهى بتقول
‘لو الكلام يعبرعن الحنان كنت قولت إني بحبك من زمان’
بس الاخت شيرين مكنتش تعرف ان في لغات مختلفة للحب.
لان الكلام ده لغة من اللغات للتعبير عن الحب، بس هل الكلام بس ممكن يعبر عن الحب؟.
اه ممكن يعبر عن الحب واه ممكن ميعبرش عن الحب.
يعني ايه الكلام ده؟؟
يعني ببساطة خالص لو لغة شريكك في الحياة هي الكلمات و ان الكلمة بتفرق معاه او معاها هيبقي فعلا بالنسبة للشخص ده الكلام هيعبر عن الحنان فعلا.
بس المشكلة بقي بتحصل امتي؟
بتحصل لو انت بتعبر عن الحنان و عن حبك لشريكك بالكلام، ولكن برضه الحب مش واصل و انت او انتي مش فاهم او فاهمة ده ليه حاصل.
ببساطة ده حاصل عشان شريكك بيبقي محتاج تعبير عن الحنان بطريقة مختلفة غير الكلام.
ودي من المشاكل اللي بتحصل ان كل حد في العلاقة شايف انه عامل اللي عليه و شايف انه بيدي لشريكه حنان و حب و احتواء و تقدير و مع ذلك برضه تفضل المشكلة حاصلة، و كل حد في العلاقة بيقول انه مش شبعان عاطفيا.
ودي المشكلة ان كل حد في العلاقة بيدي الحنان و الحب و المشاعر من منظوره هو مش من منظور شريكه،فتفضل مشكلة الفراغ العاطفي حاصلة بين الطرفين.
اتكلموا مع بعض وشوفوا ايه اللى بيشبع كل حد فيكم و ايه الطريقة الاحسن في التعبير عن المشاعر لكل حد فيكم و افهموا لغات الحب بتاعتكم.
عشان تعرف ايه هي لغة الحب بتاعتك وبتاعت شريكك ابعت لي علي الصفحة و اسالني و متنساش تسالوا عن تفاصيل جلسات الكوتشينج و انتو بتبعتوا للصفحة.