وجينا للسم التالت من سموم العلاقات وهو:
3-الإزدراء CONTEMPT.

خلينا نشوف يعني ايه إزدراء:هو التريقة…الإستهزاء…التسفيه من الرأي…..أي حاجة فيها تقليل من إللي قدامي….دي تسمي ” إزدراء”.
“طبعا كل واحد هيبقي عنده تعريفه الخاص باللإزدراء”

“جوتمان” بيقول إن السم ده من أخطر السموم الأربعة، والسم ده بالذات لو بقي موجود في العلاقة بيتنبأ بنسبة 94% إن العلاقة دي هتنتهي.

مشكلة الإزدراء، إن الشخص إللي بيمارس الإزدراء ده بيبقي متعمد يأذي إللي قدامه ويقلل منه ويحقر منه، لأن الإزدراء بيقول “أنا أحسن منك وأنت أقل مني” فالشخص إللي بيمارس سلوك الإزدراء ده، بيبقي أغلب الوقت حاسس بفوقية، دايما حاسس إنه أعلي من إللي قدامه، عنده الأنا عالية شويتين تلاتة كده.

ناخد مثال عشان نفهم:
ياسين ونهلة بيتكلموا في موضوع مهم وبيتناقشوا مع بعض في وجهات نظرهم عشان يحلوا المشكلة دي، المهم نهلة لسة هتتكلم وتقول رأيها، ياسين قال لها: هو إنتي هتعمليلي فيها أم العريف، وإنتي إللي بتفهمي يعني، إشجينا ياسيتي إتفضلي.

موقف تاني:
نهلة كانت مستنية ياسين عشان عايزة تنزل معاه تجيب حاجات للبيت بس ياسين إتأخر، بتسأله بتقوله:
نهلة:إتأخرت ليه؟

ياسين: معلش يا حبيبتي اص……

لسة مكملش الكلمة لقي نهلة بتقوله

نهلة: طبعا هتقول لي حجة من الحجج بتاعتك ولا عندك حجة جديدة هتقولها المرة دي، اتفضل قوول إطربني.

طبعا معروف نهاية الحوار دي عاملة إزاي؟؟

“لو الحوار التاني ده كمل هيكمل إزاي ؟؟”

“مستني مشاركاتكم في الكومنتات ”

شوفتوا الحوار ده وإزاي كل من ياسين ونهلة مارسوا سلوك الإزدراء مع بعض إللي عمره ما هيوصل لنتيجة أصلا.

طيب إيه الحل؟؟

الحل متقسم لحاجتين:
1-حل عل المدي القريب “short-term”
-إنك توصف مشاعرك وإحتياجاتك الخاصة.

خلينا نطبقها علي المثال إللي فوق:

موقف تاني:
نهلة كانت مستنية ياسين عشان عايزة تنزل معاه تجيب حاجات للبيت بس ياسين إتأخر، بتسأله بتقوله:
نهلة:إتأخرت ليه؟

ياسين: معلش يا حبيبتي اصل كان عندي شغل كتير.

نهلة: أنا مقدرة طبعا مشاغلك، وإنك أكيد غصب عنك التأخير ده، بس أنا ببقي مضايقة لما تتأخرعليا، ممكن لو هتتأخر المرة إللي جاية تبقي تكلمني تقولي بس.

شوفتوا الفرق نهلة هنا عبرت عن مشاعرها وعبرت عن احتياجها الخاص بيها.

دي اول حاجة في الحل،

الحل التاني إللي قال عليه جوتمان، في الحل ده د/جوتمان بيسميه:
-علي المدي البعيد: وهو بناء بيئة بينك وبين شريك حياتك من الإحترام والمودة والحب، وقال إن خلق البيئة ده بيقوي جهاز المناعة بتاع العلاقة إللي بينك وبين شريكك.

طيب وده يحصل إزاي؟؟
-يحصل عن طريق تقديم حاجات إيجابية صغيرة بس مستمرة، يعني إيه الكلام ده؟

خلينا ناخد مثال:
-يعني مثلا تظبط خروجة حلوة كده مفجاة لمراتك او خطبتك وتعملهالها مفجأة.

-تبعتلها رسالة بدون أي سبب بتشكرها فيها.

-لو لقتها مضايقة وأنت نازل مثلا…ممكن تاخر نزولك وتقعد شوية معاها وبعد كده تنزل.

وطبعا في كمان دور علي الست إنها تقدم حاجات إيجابية صغيرة مستمرة.
قيسوا عل الأمثلة إللي فوق دي، الحاجات دي بتعمل رصيد عند شريكك وبتبني زي حيطة سد كده فى مواجهة المشاكل والخناقات إللي بتحصل في العلاقة.

-الجميل بقي إن لقوا أكتر ناس سعداء هما أكتر ناس كان عندهم تاريخ حلو وإيجابي في علاقتهم.
حاولوا تبتدوا تبنوا بيئة إيجابية فيها حب ومودة واحترام.

Coaching_With_Moaz

Leave a Reply

Your email address will not be published. Required fields are marked *