“الايام دي مش عاطفية
مبقتش سهلة كمان الدبلة مسئولية”

جملة عبقرية بصراحة “الدبلة مسؤولية ” وتعالوا كده نرجع ورا شوية بالزمن ونروح لمشهد من فيلم “اضحك الصورة تطلع حلوة ”

المشهد:

شوفوا المشهد وبعدين كملوا.

بعد ما شوفتو المشهد وكلمة احمد زكي في الحوار “ان الكلمة عقد….وكلمة بحبك عقد…..الوعد بالجواز اكبر عقد”
وهنا تيجي فكرة المسؤولية وأهميتها.

المسؤولية في العلاقة بتبتدي مع بداية العلاقة، بداية ما طلبت انك تتعرف اكتر عشان عايز تتقدم…..البداية دي لوحدها مسؤولية، يعني حضرتك بقيت دلوقتي مسؤول عن الكلمة اللي انت قولتها.

يعني مينفعش تقول الكلمة دي وتطلع منك وانت اصلا مش عارف ان دي وراها مسؤولية، والمسؤولية المقصوده هنا انك تكون قد الكلمة اللي انت قولتها وتكون راجل، يعني بلاش افكرة “مرحلة الاستهبال ” ودي ممكن نبقي نتكلم فيها بعدين.

لما تقول كلمة وتوعد بيها خليك راجل واستحمل تبعات الموضوع فيها، ومش معني كلامي ان لو لقيت ان انتوا مش مناسبين تفضل مكمل لا خالص ده من المسؤولية والرجولة اصلا انك تبقي واضح وتتكلم وتقول ان احنا مش مناسبين عشان واحد اتنين تلاتة عادي خالص، لكن بلاش ميوعة في العلاقات.

ايه أهمية المسؤولية في العلاقة ؟؟
هو عامل مهم لان ده بيدل ان علي علاقة صحية سليمة قائمة علي مسؤولية كل طرف في العلاقة وكل طرف عارف ايه مسؤولياته وايه هي كمان المسؤوليات المشتركة في العلاقة.

ولما ده بيبقي حاصل بتزيد الثقة في العلاقة، وكل طرف بيعرف انه مسنود من الطرف التاني وبالتالي بيبقي في تناغم في العلاقة حقيقي ومش هش.

ملحوظة: مهم اوى الادوار بتتلغبطش والمسؤوليات تبقي معكوسة عشان ده بيبوظ العلاقة.

طيب نعمل ايه عشان يبقي في مسؤولية في العلاقة:

1-بلاش لعبة اللوم : من اكبر علامات انك تكون مسؤول انك متلعبش لعبة اللوم دي وتتقبل عيوبك واخطائك وتبقي معترف بيها.

2-يبقي عندك القدرة علي الاعتذار والتسامح: مفيش حد كامل وكلنا مليانين عيوب، فمن المسؤولية في العلاقة انك تبقي عندك المسؤولية انك تعتذر عن الغلط وتسامح عليه.

3-الصدق التام: من الحاجات المهمة في العلاقة وبتقوى المسؤولية جدا انك تكون صادق وامين في العلاقة وتبقي متحمل مسؤولية ده.

الموضوع كبير ومهم عشان كده هسيبلكوا لينك لو حابين تقرأوا اكتر في الموضوع:

Why Is Accepting Responsibilities in a Relationship Important?